नियम ५ : पैठारी प्रवेश अनुमतिपत्रका लागि निवेदन दिनेः (१) बिरुवा, बिरुवाजन्य उपज, बायोलोजिकल कन्ट्रोल एजेण्ट, लाभदायक कीरा वा बिरुवा हुर्कने माध्यम जस्तै माटो,  झ्याउ, पीट आदि नेपालमा पैठारी गर्न चाहने व्यक्ति वा संस्थाले दुईसय रुपैयाँ निवेदन दस्तुर संलग्न गरी प्रवेश अनुमतिपत्र प्राप्त गर्न कार्यालय प्रमुख समक्ष अनुसूची–१ बमोजिमको ढाँचामा निवेदन दिनु पर्नेछ ।  तर त्यस्तो वस्तु अनुसन्धान प्रयोजनको लागि पैठारी गर्ने भएमा यस उपनियम बमोजिमको निवेदन राष्ट्रिय प्लाण्ट क्वारेण्टाइन कार्यक्रमको प्रमुख समक्ष दिनु पर्नेछ ।

(२) उपनियम (१) बमोजिम निवेदन दिंदा निवेदनको साथ देहायका कागजातहरु संलग्न गर्नु पर्नेछः–

(क) पैठारीकर्ताको नागरिकताको प्रमाणपत्र वा राहदानीको प्रतिलिपि,

(ख) संस्थाको नामबाट पैठारी गर्न चाहनेले त्यस्तो संस्था दर्ता र नवीकरण गरेको प्रमाणको प्रतिलिपि,

(ग) पैठारी गरिने बस्तुको अग्रिम बील बीजक (परफर्मा इन्भ्वाइस) को प्रतिलिपि,

(घ) बीउ विजन पैठारी गरिने भए बीउ विजन गुणस्तर नियन्त्रण केन्द्रको सिफारिस,

(ङ) अनुसन्धानको लागि पैठारी गरिने भए अनुसन्धान गर्ने व्यक्ति वा संस्थाको अनुरोधपत्र र नेपाल कृषि अनुसन्धान परिषद्बाट गरेको सिफारिस ।

(३) उपनियम (१) बमोजिम प्राप्त निवेदन साथ संलग्न कागजात जाँचबुझ गर्दा कार्यालय प्रमुखले प्रवेश अनुमतिपत्र दिन मनासिब देखेमा बिरुवा वा बिरुवाजन्य उपजको लागि अनुसूची–२ बमोजिमको ढाँचामा, वायोलोजिकल कन्ट्रोल एजेन्ट वा लाभदायक कीराको लागि अनुसूची–३ बमोजिमको ढाँचामा, माटो, झ्याउ, पीट वा अन्य बिरुवा हुर्कने माध्यमका लागि अनुसूची–४ बमोजिमको ढाँचामा र जर्मप्लाज्म, जीवित परिमार्जित वस्तु, अनुवांशिक परिमार्जित वस्तु वा ट्रान्सजेनिक पदार्थको अध्ययन अनुसन्धानको लागि

अनुसूची–५ बमोजिमको ढाँचामा प्रवेश अनुमतिपत्र दिनेछ ।

(४) कुनै व्यक्ति वा संस्थाले उपनियम (१) बमोजिम अग्रीम रुपमा पैठारी

अनुमतिपत्र लिन नसकेको कारण देखाई उपनियम (२) बमोजिमका कागजातहरु संलग्न गरी प्रवेश नाकामा नै प्रवेश अनुमतिपत्र लिन निवेदन दिएमा त्यसरी अग्रीम रुपमा अनुमति लिन नसकेको कारण मनासिब देखिएमा कार्यालय प्रमुखले एक हजार रुपैँया दस्तुर लिई प्रवेश नाकामा उपनियम (३) बमोजिम अनुमतिपत्र दिन सक्नेछ । तर अनुसन्धानको प्रयोजनको लागि पैठारी प्रवेश अनुमतिपत्र नलिईकन यस उपनियम बमोजिम प्रवेश नाकाबाट अनुमतिपत्र दिईने छैन ।

(५) उपनियम (३) बमोजिम पैठारी प्रवेश अनुमतिपत्र प्राप्त गर्ने व्यक्ति वा संस्थाले ऐनको दफा ७ को उपदफा (२) बमोजिम मन्त्रालयले तोकेको पैठारी सम्बन्धी शर्त तथा बन्देजको पालना गर्नु पर्नेछ ।

(६) उपनियम (३) बमोजिम जाँचबुझ गर्दा संलग्न गरिएका कागजात अपर्याप्त भएको वा अन्य कारणबाट प्रवेश अनुमतिपत्र दिन उपयुक्त नदेखिएमा कार्यालय प्रमुखले सात दिनभित्र निवेदकलाई अनुसूची–६ बमोजिमको ढाँचामा जानकारी दिनु पर्नेछ ।